Аб пошуках пахавання салдата Пятра Гайдука
02.08.2022 г.Такім чынам, пошукі пахавання салдата Пятра Гайдука амаль завяршыліся. Асноўную працу правяла сям'я Макрыні. Яны знайшлі тыя самыя старыя камунальныя могілкі ў горадзе Скафа, звязаліся з мэрыяй і дамовіліся аб дапамозе.
На наступным этапе вялізную дапамогу аказаў спадар Дзіна Марангоні, Старшыня Савета камуны Скафа і сіньёра Сільвія Джофрэ. Менавіта яны разам з сям'ёй Макрыні правялі нас на гэтыя самыя могілкі, паказалі манумент безназоўным загінуўшым, дзе, хутчэй за ўсё, і Пётр Гайдук. Больш за тое, яны правялі аналіз архіва Скафы і дамовіліся аб дапамозе ў камуне Манапеллы, дзе мы таксама змаглі вывучыць архіўныя запісы.
На жаль, у іх не знайшлося згадкі пра Пятра Гайдука. Але гэта толькі пацвярджае наша першапачатковае меркаванне аб месцы яго пахавання.
Для таго, каб паставіць кропку ў даследаванні, Амбасада запытае афіцыйна інфармацыю ў Міністэрства абароны Італіі.
Аднак праца амаль завершана. Зроблена гэта дзякуючы добрым сэрцам нашых італьянскіх сяброў. Мы вельмі ўдзячныя ім за гэта!